Në këto ditë të vështira për të gjithë botën, kujdesi ndaj pacientëve është më kryesori. Bluzat e bardha jo vetëm brenda vendit por edhe përtej kufijve janë në shërbim të pacientëve shqiptarë duke përdorur të gjitha mënyrat. Sot kur kontakti fizik për të takuar mjekun është i vështirë për shkak të pandemisë, mjekët kanë menduar që të ofrojnë shërbimin e tyre edhe nëpërmjet këshillimit apo vizitave online me pacientët që kanë shqetësime nga më të ndryshmet. Nisma më e fundit është marrë nga Federata e Mjekëve Shqiptarë në Evropë të cilët nëpërmjet këshillimit online po ju japin përgjigje shumë pacientëve shqiptarë anembanë botës. Mjekë të të gjitha specialiteteve në kohë reale , përgjigjen dhe rekomandojnë hapat e nevojshme që duhet të ndjekë një pacient shqiptarë i cili për arsye nga më të ndryshmet e në veçanti në kushtet e karantinës e ka të pamundur që të kontaktojë fizikisht mjekun e familjes apo edhe një mjek tjetër më të specializuar.