E pazakonta e kësaj epidemie që po përballet e gjithë bota ndaj koronavirusit është se njerëzimi po përballet me një virus të panjohur, ndaj dhe pasojat në disa vende të botës ashtu si në Italinë fqinje kanë qenë të rënda. Por si e sheh trendin në Shqipëri, a mund të shpresojmë që vendi ynë nuk do të përballet me skenarin e keq të Italisë. Dr, Arben Gjata ka një opinion sigurisht të bazuar dhe në situatën e vendit fqinj. "Nga ekspertë të fushën jemi përgatitur për disa skenar; nga më i miri te skenari më i keq. Por në këtë fazë qe jemi pa dashur të tremb njeri, është e rëndësishme ndërgjegjësimi i qytetarëve pasi sjellja e tyre mund ta ndryshojë situatën nga një skenar në një skenar tjetër. Natyrisht ne kemi marrë të gjitha masat." I pyetur se sa është projeksioni i të prekurve me Covid-19 në vendin tonë nisur nga shifrat e deklaruara, Dr. Arben Gjata tha se: "Vetëm 20 % e atyre që preken nga koronavirusi paraqesin shenja klinike dhe 80% e të prekurve nuk paraqesin asnjë simptomë edhe pse janë mbartës. Janë kjo kategori që qarkullon pa e ditur se është i infektuar. Kështu që teorikisht në rastin më optimal i bie të jenë 5 herë më shumë të prekur nga koronavirusi sesa janë të sëmurët e identifikuar"- tha ai.