Pavarësisht pandemisë, ata që punojnë në botën e artit nuk i kanë ndalur projektet e tyre. Kështu ka ndodhur edhe me regjisorin shqiptar, i cili tashmë ka një karrierë të suksesshme në kinematografi edhe përtej kufijve shqiptarë. E kemi fjalën për Andi Delianën, i cili edhe pse jeton prej vitesh në Amerikë është kthyer tashmë në Shqipëri për të risjellë projektin e tij më ri kinematografik, një film i cili titullohet "Misioni". Filmi tregon për ngjarjet historike të viteve 80' në Shqipëri e Francë, në një periudhë ku po përgatitej një ndryshim i madh në Evropën e atëhershme, që është mbarimi i Luftës së Ftohtë. Ajo që është interesante dhe që do ta zbulojmë nëpërmjet bisedës është përfshirja në këtë film e aktorëve të njohur shqiptarë por edhe me famë ndërkombëtare. Më konkretisht, pjesë e filmit do të jenë aktorët shqiptarë Ndriçim Xhepa, Arben Bajraktaraj, Gent Bejko ,Gentian Zenelaj, Ardian Cerga, si edhe emra ndërkombëtarë si: Lia Sanchez Baltodano apo Luis Lombardi, por ndërkohë po punon për të afruar në këtë film edhe aktorin Miachael Madsen, një nga protagonistët e filmave të Tarantinos.