Mimi Kodheli së fundmi është zgjedhur në postin e Zv.Presidentes së Asamblesë Parlamentare të NATO-s. Aktualisht, ajo është edhe Kryetare e Komisionit Parlamentar për Politikën e Jashtme dhe Kryetare e Delegacionit parlamentar shqiptar në Asamblenë NATO. Por më herët ajo ka mbajtur poste të rëndësishme si nënkryetare e Bashkisë së Tiranës dhe postin e Ministres në Ministrinë e Mbrojtjes. Por në këtë rrugëtim të gjatë në politikë, cili ka qenë momenti më i vështirë i saj apo vendimi më i vështirë që ka marrë gjatë karrierës së saj. "Kam pasur periudha të vështira gjatë kohës që kam qenë Ministre e Mbrojtjes. Pozicioni ka qenë i vështirë, sa i rëndësishëm si post aq edhe me përgjegjësi. Një moment i vështirë për mua në këtë post kam kaluar kur janë aksidentuar dy pilotët e forcave ajrore. Ka qenë një moment shumë i vështirë, një dhimbje shumë e madhe jo vetëm si ngjarje por ata i njohja personalisht. Ky ka qenë një moment që nuk do të kisha dashur ta përjetoja. Unë kam qenë njeriu i parë që kam njoftuar familjet e tyre për atë se çfarë kishte ndodhur. Ka qenë një ngarkesë shumë e madhe emocionale që nuk do të kisha dashur asnjëherë të ndodhte dhe unë të isha një ndër protagonistet"- tha për Wake Up, politikania Mimi Kodheli.