Pas 18 nëntorit kush dhunon gruan do të largohet nga shtëpia. Nëse më parë dhunuesi largohej nga banesa pas vendimit të gjykatës, tani sapo denoncohet rasti, policia largon menjëherë dhunuesin ndërsa gjykata vlerëson rastin. Kjo është një nga pikat që ka ndryshuar në ligjin për për masat kundër dhunës në familje. Ndryshimet ligjore parashikojnë që në urdhrin e mbrojtjes, të lëshuar me vendim gjykate, dhunuesi detyrohet të marrë pjesë në programe rehabilitimi psikosociale ose në programe të aftësimit prindëror, të organizuara nga subjekte publike ose private. Në bazë të ndryshimeve të ligjit, dhunuesi nuk largohet nga banesa vetëm nëse është i mitur, i moshuar apo person me aftësi të kufizuar. Kujtojmë se gjatë kohës së izolimit kur nisi dhe pandemia, dhuna në familje, kryesisht ndaj grave u rrit ndjeshëm në shumë zona të vendit. Që prej vitit 2010 në Shqipëri kanë humbur jetën 106 gra dhe vajza, viktima të dhunës në familje,73 prej të cilave janë vrarë nga bashkëshortët e tyre. Në 90 përqind të vrasjeve autorët janë meshkujt. Sipas INSTAT / UNDP mbi 53 % e tyre, ose rreth 750 mijë gra dhe vajza në Shqipëri, deklarojnë se kanë qenë të paktën një herë në jetën e tyre viktima të dhunës në familje. Përmasat e dhunës në familje janë edhe më të mëdha pasi pjesa më e madhe e rasteve nuk denoncohen, për shkak sepse viktimat e shohin dhunën në familje si një ҫështje private. Sipas Nexhmije Beqirit, avokate, kjo lloj dhune është shumëfishuar vitet e fundit dhe sidomos gjatë periudhës së pandemisë. Nga studion e Wake Up në Top Channel, avokatja shpjegoi ndryshimet e ligjit dhe sa i zbatueshëm është në ai në praktikë.