Përgjatë periudhës së izolimit askush nuk është ndarë nga pasionet e tij, duke gjetur mënyra nga më të ndryshmet për t’i realizuar ato, qoftë dhe për t’i pasur si kujtim i kësaj situate të pazakontë... Në fillim ishin këngëtarët ata që sollën video të ndryshme të realizuara në kushte karantine, më pas artistë të tjerë të fushave të ndryshme e deri tek sportistët për të cilët aktiviteti fizik është mëse i domosdoshëm. Videot e realizuara në kushtet e karantinës kanë qenë ato të cilat kanë tërhequr edhe më shumë vëmendje, aq më tepër kur vijnë edhe si një mesazh i caktuar. “Futbolli gjithmonë na bashkon” është video e publikuar vetëm pak ditë më parë në rrjete sociale e cila ka bërë bashkë 14 ish futbollistë nga Shkodra, të cilët i përkasin brezave të ndryshëm. Ideatori i kësaj video është Marjan Marku, ish futbollist nga qyteti i Shkodrës nga lagjia Arra e Madhe, ku për herë parë në Shqipëri është luajtur futboll. Prej 2 vitesh Marjani është shkëputur nga futbolli për arsye të ndryshme dhe aktualisht jeton në provincën Massa – Carrara, në rajonin e Toskanës, Itali.