Që prej fillimit të përhapjes së koronavirusit, këshilla më e shpeshtë e mjekëve në të gjithë botën është që të lajmë dhe të dezinfektojmë duart sa më shpesh. Kjo është cilësuar si një masat kryesore për të minimizuar sa më shumë rrezikun e infektimit. Por nga ana tjetër gjithmonë e më shumë po ankohemi për probleme të dukshme me lëkurën e duarve si tharje, acarim, skuqje e deri në plasaritje. Ky është një problem për të gjitha moshat, veҫanërisht për ata që kanë një lëkurë të thatë por edhe për fëmijët. Duke u munduar që të ruajnë sa më shumë higjienën personale, prindërit po dezinfektojnë me alkool edhe të vegjlit, deri tek bebet, ndonëse kjo mund të jetë e dëmshme. Ne ishim sot me dermatologen Erjona Shehu për të na dhënë disa këshilla se si mund të hidratojmë sadopak duart në këtë periudhë të vështirë.