Me rritjen e rasteve të të infektuarve me COVID-19 në Shqipëri, sektori i turizmit po bie më tej në gjendje të rëndë. Teksa numri më i madh i të punësuarve në këtë sektor po vuajnë mungesën e turistëve të huaj, të cilët janë reduktuar me të paktën 80% gjatë këtij sezoni, sipërmarrjet turistike përballen me vështirësi të theksuara financiare. Ata shprehen se aktualisht janë larg edhe minimumit të pritshëm dhe se po mbajnë thjesht bizneset hapur. Shoqata e Operatorëve Turistikë thotë se edhe ata që po punojnë, po punojnë në minimumin e pritshëm. Shoqata i ka kërkuar prej kohësh qeverisë një program të veçantë për këtë sektor dhe të adresojë kërkesat e këtij sektori me rëndësi për ekonominë e vendit. Kliton Gërxhani, i Shoqatës së tur-operatorëve tha se qeveri nuk duhet të tregohet kaq indiferente ndaj krizës së operatorëve turistikë. "Charter-at me turistë të huaj i mundësojnë dhe i sjellin operatorët turistikë, Ministria e Turizmit nga ana e saj thjesht kujdeset t'ju dërgojë lule në aeroport"- tha Gerxhani duke "thumbuar" në këtë mënyrë qeverinë që pritjen e turistëve të huaj në aeroportin e Rinasit e propagandon si ndihmë për turizmin shqiptar në këto kohë të vështira që po kalon.