Këtë fundjavë që lamë pas (ditën e premte) është risjellë me anë të një video “Kënga e mjekut” (e vitit 1963) e artistes së madhe Anida Take, me muzikë të Agim Prodani, kompozitorit dhe themeluesit të muzikës së lehtë shqiptare. Dy prej artistëve që i kanë lënë pasuri vendit tonë… Përgjatë këtyre ditëve kjo video është shpërndarë dhe pëlqyer masivisht. ”Kënga e mjekut” ka ardhur si një falenderim për të gjithë bluzat e bardha, për mjekët shqiptarë si një shenjë mirënjohje e pakufishme që me humanizmin e tyre profesional e janë në balë të frontit, duke u kujdesur për të prekurit nga korona dhe që çdo ditë e më shumë janë duke sakrifikuar përballë kësaj situate dhe përballë këtij virusi i cili vret në heshtje. “Kënga e mjekut”, e sjellë përmes një video ka bërë bashkë 23 personazhe të ndryshëm publik, si këngëtarë, gazetarë, aktorë, instrumentistë dhe sportistë. Kënga është realizuar nga Dj dhe regjisori, Ervin Xhixho me orkestracion dhe produksion të kantautorit Saimir Çili dhe me mbështetjen e kantautorit, Kujtim Prodani.