Policia e Shtetit ka dalë sot me një deklaratë për t'i ardhur në ndihmë qytetarëve që të mos bien pre e mashtrimeve nëpërmjet aplikacioneve të mesazhit. Këto mesazhe janë me qëllim mashtrimin e shtetasve që vendosin t’iu përgjigjen atyre. Një ndër mesazhet më të përhapura muajin e fundit quhet “Mashtrimi i WhatsApp”, i cili ka marrë emrin e tillë pasi në shumicën e rasteve dërgohet në këtë aplikacion. Bëhet fjalë për persona me numra të huaj telefoni të cilët dërgojnë një mesazh në aplikacionin WhatsApp me tekst në gjuhën angleze, që në gjuhën shqipe ka kuptimin që ju jeni përzgjedhur për të fituar 700 mijë dollarë. Mesazhi i kërkon përdoruesit që të vendosë të dhënat e tij për të përfituar shumën në fjalë. Të dhënat që do të kërkohen kanë të bëjnë me emrin e plotë, vendin, numrin e telefonit të kontaktit, shtetësinë, adresën, moshën, gjininë, statusin civil dhe punësimin. Organizatori i kësaj skeme mashtrimi, aktualisht është i paidentifikuar, por gjatë kësaj dekade këto lloj mashtrimesh bëjnë pjesë në ato që quhen “Mashtrimet Nigeriane”. Në fakt mashtrime të tilla kanë qenë gjithmonë prezente por së fundmi duhet se janë përhapur edhe më shumë duke përfituar edhe nga situata e vështirë ekonomike që po kalojnë shumë njerëz. Mashtrime të tilla bëhen edhe përmes rrjeteve sociale apo adresave të email. Ekspertët e IT-së këshillojnë se si duhet të kemi kujdes që të mos rrezikojmë të dhënat apo të ardhurat tona.