Të gjithë këto kohë jemi solidarizuar me mjekët, të cilët janë në frontin e parë të betejës kundër virusit që vret në heshtje. Këtë mëngjes do të shkojmë në një lidhje skype në Gjakovë, Kosovë ku na pret Doktor Jetish Jetishi, specialist i neurologjisë dhe shef i repartit të Neurologjisë në Spitalin Regjional “Isa Grezda” në Gjakove. Doktor Jetishi është infektuar me Kovid -19 në krye të detyrës në Repartin e Emergjencës dhe më tej ka infektuar edhe vajzën e tij 20-vjeçare, e cila deri më tani është asimptomatike. Dr. Jetishi pasi rezultoi me Kovid -19, ka qëndruar 10 ditë i shtruar në spital dhe deri më tani është mjeku i parë i prekur nga Kovid -19 në Kosovë. Por fatmirësisht ai e ka mposhtur këtë virus dhe e ka lënë spitalin pak ditë më parë (fundjavën e shkuar) e tashmë do të qëndrojë në shtëpi, i izoluar derisa të kalojnë 14 ditë.