Vitet e fundit është dyfishuar numri i martesave që përfundojnë në divorc. Në fakt për krizën në familjen shqiptare është folur shumë në studio të ndryshme televizive por për një nismë që prej 9 vitesh predikon martesën e shëndetshme pak flitet. Nga data 7 shkurt deri në 14 shkurt, po organizohet ajo që njihet si "Java e Martesës". Më shumë se 30 vende të botës e festojnë këtë javë duke organizuar aktivitete të ndryshme ku janë të përfshira ҫiftet por nuk përjashtohen detyrimisht beqarët :). Sipas kësaj lëvizje ndërkombëtare, java e martesës synon t’u kujtojë çifteve të martuara në Shqipëri t’i japin prioritet njëri-tjetrit. Aktivitet e Javës së Martesës kanë si qëllimin të inkurajojë çdo çift, pavarësisht nëse janë të sapomartuar, apo gjyshër, që të investojnë kohë dhe energji për forcimin e martesës së tyre. Duket se rëndësia e institucionit të martesë ka ndryshuar gjerësisht vitet e fundit. Në Shqipëri, veҫanërisht në vitet e fundit ka një numër të shtuar të divorceve për arsye nga më të ndryshmet. Studime të ndryshme tregojnë se njerëzit duhet të martohen rreth moshës 28-32 vjeҫ. Sipas sociologëve, në këtë moshë njerëzit janë mjaftueshëm të rritur për të kuptuar nëse vërtet duan të jenë së bashku. Ata janë të përgjegjshëm për zgjedhjen më të rëndësishme të jetës dhe marrin përsipër detyrimet.