Vetëm një muaj e gjysmë pas konstituimit, Njësia e Kërkim-Studimit të Sizmologjisë dhe Gjeoshkencës pranë Akademisë së Shkencave përgatiti raportin për masat që duhen marrë për futjen e Eurokodit si dhe për garantimin e ndërtimeve të qëndrueshme e rezistente. Ekspertët kanë paraqitur propozimet e tyre për procedurat dhe futjen e Eurokodit 8, për garantimin e strukturave ndërtimore të qëndrueshme e rezistente ndaj tërmeteve. Raporti i dorëzohet edhe Komitetit të Rindërtimit lidhur me kushtet e projektimit të ndërtesave në Shqipëri. Ekspertët theksojnë se ka ardhur koha që Eurokodet të bëhen të detyrueshme me ligj dhe duhen ndërmarrë hapat e shpejtë që të ngrihet një njësi e posaçme, e pandikuar nga faktorë jashtë fushës teknike, e cila do të vërë në zbatim dhe do të mirëmbajë kodet e ndërtimit në përgjithësi dhe të trajtojë në veçanti çështjet e vlerësimeve sizmike të ndërtesave.