Fatkeqësisht rastet e përndjekjes, shantazhit, kërcimeve online ndaj fëmijëve dhe të rinjve në Shqipëri kanë marrë përmasa shqetësuese. Raporti i dytë Kombëtar për Sigurinë në Internet, i realizuar nga ekspertët e Qendrës për Mbrojtjen e të Drejtave të Fëmijëve dhe Qendra Kombëtare për Internet të Sigurt në Shqipëri fakton se ndërsa gjatë vitit 2018, kërcënimet, shantazhi dhe përndjekja zunë vetëm 2% të raportimeve të fëmijëve dhe të rinjve, në vitin 2019, ky fenomen u rrit në thuajse 12%.Gjuha e urrejtjes përbën incidentin më të raportuar nga fëmijët dhe të rinjtë, si gjatë vitit 2018 ashtu edhe në vitin 2019. Instagram është platforma në të cilën fëmijët dhe të rinjtë kanë ndeshur më shumë dhunë, bulizëm, abuzim apo vjedhje të profilit, pornografi të fëmijëve, nuditet apo gjuhë urrejtje, me rreth 68% të ankesave, ndjekur nga Youtube me 17% dhe Facebook me 4%. Ndërkaq raporti tregon se të dyja gjinitë përballen me fenomenet negative që rrjedhin nga interneti jo i sigurt, duke ngritur kështu një alarm se është momenti që institucionet të reagojnë për të mbrojtur fëmijët dhe të rinjtë shqiptarë. Rreth të dhënave të raportit por edhe si është reagimi deri tani i institucioneve ndaj këtyre veprave penale që ndodhin online, folëm sot me Klaudio Pulahën, përfaqësues i Qendrës të të Drejtave të Fëmijëve (CRCA/ECPAT).