Ka shkuar në 494 numri i të prekurve në Shqipëri, teksa deri në komunikimin e djeshëm në 24 orë rezultuan pozitivë 19 persona. Rastet e reja ishin në Tiranë, një në Krujë, një në Elbasan dhe pesë në Kukës, qytet i cili është shfaqur tashmë si vatër e re. Rovena Daja, epidemiologe Institutit të Shëndetit Publik tha se sot do të dalin rezultatet e gjurmimit epidemiologjik të rastit pozitiv me Kovid në Kukës. "Rasti i parë në Kukës është një infermier që mendohet se është infektuar gjatë kontaktit me një person pozitiv gjatë transportit që i bëri pacientit nga Hasi për në Tiranë. Më pas infermieri ka infektuar edhe personat e familjes. Aktualisht po bëjmë hetimin dhe gjurmimin e epidemiologjisë të të gjitha kontakteve që ai ka pasur. Mbrëmë në ISHP erdhën dhe mostrat e testimit epidemiologjik të kontakteve të rastit pozitiv dhe sot priten përgjigjet. E rëndësishme është që janë identifikuar dhe nuk ka asgjë për t'u shqetësuar".