Një ditë për t’u shënuar në kalendarin e futbollit shqiptar 14 dhjetori 2019. Plot tre trajnerë të shkarkuar nga ekipet e Superiores. Pas Partizanit me italianin Franko Lerda, kanë bërë të njëjtën gjë edhe Teuta me Bledi Shkëmbin dhe Luftëtarin me grekun Jorgo Marantas. Vetëm pak ditë më parë Tirana kishte shkarkuar Julian Ahmatajn. Dhe gjithçka po ndodh kur ka mbetur vetëm kjo fundjavë për të mbyllur Kampionatin (Superliga rihapet diku nga 20 janari). Nga ana tjetër, nëse sheh tabelën e renditjes, shumica e ekipeve kanë thuajse të njëjtat pikë. Aktualisht Kukësi vazhdon të jetë në vendin e parë, pas fitores që mori në Shkodër ndaj Vllaznisë. Verilindorët kanë nisur shkëputjen dhe momentalisht kanë 30 pikë, tre pikë më shumë se Bylisi, që mori një fitore shumë të vlefshme ndaj Laçit, në fushën e vet. Në vendin e tretë është ngjitur Tirana, e cila me fitoren ndaj Flamurtarit, ka shkuar në kuotën e 25 pikëve. Po kaq pikë kanë edhe Partizani, Teuta e Laçi, që humbi në Ballsh. Në Durrës Teuta mposhti Partizanin, mes shumë tensionesh dhe e ka barazuar me pikë të kuqtë. Ndërkaq në vendin e shtatë ndodhet Vllaznia me 23 pikë, ndërsa Skënderbeu mbetet në vendin e tetë me tre pikë më pak se shkodranët. Luftëtari nuk ka ndryshuar pozicion me fitoren që mori ndaj Skënderbeut, por ka shkuar në kuotën e 11 pikëve dhe mban sado pak gjallë shpresat për mbijetesë. Ndërsa i zhytur duket Flamurtari që ka vetëm 6 pikë dhe ndodhet në vendin e fundit të tabelës së klasifikimit, pas humbjes në kryeqytet nga Tirana.