Suedia mund të konsiderohet si shteti i vetëm që nuk iu tremb aq shumë pandemisë. Të paktën nëse do t'i referohemi strategjisë për të mos u izoluar në shtëpi, sikurse bëri e gjithë bota. Gjatë këtyre muajve aty ka vijuar jeta intensivisht teksa njerëzit shkojnë në punë, ulen në kafene apo restorante, shëtisin në parqe apo fëmijët shkojnë rregullisht në shkollë. Aktualisht aty ka rënë ndjeshëm numri i të prekurve me KOVID-19 por ekspertët vendas (e jo vetëm) thonë se virusi do të qarkullojë të paktën deri nga vjeshta. Në Suedi problem kanë qenë kryesisht personat mbi 70 vjeҫ dhe më herët u fol në mediat vendase se nëse situata do të dilte jashtë kontrollit, do të diskutohej nëse atyre do iu jepej shërbim në spitale. Por, duket se ai skenar nuk u zbatua. Ne ishim sot në një lidhje me Gerti Xhajën, ish-kolegu ynë gazetar, i cili jeton në Suedi me familjen prej më shumë se 5 vitesh. Tashmë ai ka një profesion krejt tjetër sepse punon si mësues i gjuhës shqipe dhe ҫdo ditë i duhet të jetë në punë, pasi rreth 80-90 % e nxënësve e kanë frekuentuar mësimin gjatë kësaj kohe.