Fillimet e tij me artin kanë qenë të hershme, por në një fushë tjetër të artit, në atë të muzikës. Revistat me tregime fumeti dhe filmat vizatimorë patën një impakt tjetër tek ai duke e bërë të lërë muzikën dhe të kalojë tek vizatimet. Po flasim për karikaturistin Endri Beqo i cili duke parë revistat nisi të vizatonte personazhet e tyre dhe më tej Universiteti i Arteve i dha formë artit të Endrit, ashtu siç ai i jep formë baltës për t’i dhënë jetë skulpturave…Ai ka 16 vite që përmes vizatimeve të hedhura në letër dhe në baltë trajton fenomene shoqërore dhe aktuale. Deri më tani Endri ka realizuar rreth 900 karikatura në letër, 50 karikatura të gdhendura në skulpturë dhe 7 novela grafike. 31 - vjeçari ka hapur disa ekspozita dhe tashmë synon konkurset ndërkombëtare në mënyrë që puna e tij të përçohet edhe jashtë kufijve.