FaceApp është një aplikacion rus i cili ka bërë që të fiksohen shumë njerëz. Kohë më parë trendi që pushtoi rrjetet sociale ishte se si do të dukeshim kur të plakeshim. Ndërsa fiksimi i momentit është se si dukemi nëse ndryshojmë gjininë me opsionin "gender swipe". Në fakt ky aplikacion është krijuar që në vitin 2017 por vetëm kohët e fundit ka pasur një përdorim të gjerë jo vetëm nga njerëz të zakonshëm por edhe nga personazhe publike. Duket se jo vetëm fansat por edhe portalet në Shqipëri kanë treguar interes për të parë se si do të dukeshin politikanët shqiptarë si Edi Rama, Ilir Meta, Sali Berisha, Lulzim Basha, Erjon Veliaj apo shumë të tjerë nëse do të ishin gra. Po ashtu edhe në botë qarkullojnë foto të shumta në këtë aplikacion të politikanëve, aktorëve, këngëtarëve apo kujtdo tjetër që zotëron popullaritet. Por përtej kënaqësisë së të parit veten në versionin e kundërt, lind pyetja se sa të sigurta janë këto lloj aplikacionesh për fotot dhe të dhënat e tjera që ne kemi online? FaceApp lejohet të përdorë emrin tuaj apo ҫdo të dhënë tjetër që ne vendosim aty dhe mund të ruajë imazhin për shumë kohë pasi ne e kemi fshirë. Tomi Kallanxhi, ekspert IT tha se ndërkohë që ju argëtoheni me këtë aplikacion ai po ju vjedh të gjitha të dhënat tuaja që nga imazhi i fytyrës e deri te të dhënat e tjera identifikuese.