Përhapja e Covidit në vendin tonë, e ka çuar numrin e të prekurëve në 212 persona, ndërkohë që javët e pandemisë kanë marrë dhe jetën e 10 personave në Shqipëri. Por nëse në vendet fqinje shohim një tendencë në rritje të rasteve, fatmirësisht në vendin tonë të paktën në tre ditët e fundit ka pasur një trend në ulje të numrit të rasteve të reja, nëse bëjmë krahasimin me ditët e para të javës që shkoi ku numri i rasteve të reja shkoi deri në 28 persona në ditë. Java që shkoi u quajt nga ekspertët si "java e zjarrit", por java që kemi hyrë sipas mjekëve infeksionistë dhe epidemiologë do të jetë edhe më vendimtare për ecurinë e përhapjes së epidemisë në vendin tonë. Ajo që është shqetësuese për Shqipërinë edhe pse shifrat nuk janë të larta, sipas ekspertëve është përhapja, shtimi i vatrave të reja. Ditës së djeshme i është shtuar edhe Mirdita, me një rast të prekur.