Duke iu referuar të dhënave zyrtare, profesor Et’hem Ruka, biolog në profesion, ka analizuar shifrat dhe kurbën e Kovid-19 në Shqipëri. Sipas tij, përqindja e të sëmurëve ka ardhur gradualisht duke rënë, ndërsa kurba e të shëruarve po rritet, çka do të thotë se fundi i pandemisë mund të jetë i afërt. "Arsyetimet që unë bëj mbi shifra mbështetet në faktin nëse karantinimi vazhdon. Të sëmurët dje shkuan në 24 një shifër e lartë të cilën unë nuk e prisja. Këta të sëmurë janë infektuar maksimumi para 14 ditëve por shenjat e inkubacionit në shumicën e rasteve shfaqen pas 5.1 ditësh çka do të thotë se këta janë infektuar brenda periudhës së karantinimit. Kjo tregon se ka ende shumë punë për t'u bërë për të ndërprerë zingjirin e infektimit, përndryshe nëse kjo karantinë do të kishte qenë absolute ne nuk do të kishim asnjë rast. Fakti që ne na shtohen vatra të reja do të thotë që virusi është ende në qarkullim. Ky është një virus shumë mashtrues, shumë tinëzar edhe me sistemin imunitar. Por duhet thënë se kjo epidemi në Shqipëri është menaxhuar në mënyrën e shkëlqyer. Unë nuk gjej një pik në kurbën e epidemisë në vendin tonë. Do të uroja të vazhdonte kështu. Unë nuk jam i befasuar nga kjo pandemi, jam i befasuar për mënyrën sesi njerëzimi sot me gjithë këtë zhvillim teknologjik nuk arriti ta menaxhonte situatën. Pandemi kanë ndodhur edhe më parë. Stërgjyshërit tanë janë përballur me të tilla pandemi. Dhe këtë pandemi ne do ta fitojmë këtë pandemi pavarësisht faturës njerëzore, por kjo nuk do të thotë se në të ardhmen nuk do të përballemi me pandemi të tjera. "- tha biologu Et'hem Ruka. Nga vëzhgimet e tij dhe analiza që bën si biolog ai thotë dhe se cila moshë po preket më shumë. "Duke ndjekur statistikat, mosha më e preferuar e këtij virusi sipas të dhënave zyrtare është 50-59 vjeç pavarësisht se mortalitetit është më i lartë në moshat mbi 70-vjeç, por mosha më e prekur është 50-59 vjeç. Por ky virus ka dhe baza gjenetike që ne nuk i shpjegojmë dot për sa kohë dy njerëz të cilët kanë të njëjtën moshë dhe bëjnë të dy të njëjtën jetë të shëndetshme bien në kontakt me këtë infeksion dhe njëri e kalon më lehtë e tjetri jo."- tha ai.