Adela Vasili, epidemiologe ISHP është pjesë e ekipeve që kanë dalë tashmë në terren dhe kryejnë identifikimin dhe testimet e personave të dyshuar që mund të jenë prekur nga Kovid-19. Në një lidhje skype epidemiologia Vasili na tregoi sesi bëhet gjurmimi në terren nga ekipet e Institutit të Shëndetit Publik. "Duke krahasuar shifrat në Shqipëri nuk kemi ato shifra që kanë vendet e tjera të botës. Dhe kjo falë punës dhe gjurmimit në terren të rasteve të dyshuara"- tha ajo. Po si është procedura dhe protokolli që ndjekin këta epidemiologë në terren? "I gjithë procesi i ndjekjes së vatrave bëhet nga mjekët epidemiologë të njësive vendore të shëndetësisë. Janë ata që në bazë të protokolleve që ISHP-ja ka përgatitur për ndjekjen e vatrave bëjnë identifikimin e personave të prekur. Në momentin që këta epidemiologë identifikojnë një vatër të përhapjes së Kovid-19 fillon menjëherë puna për marrjen në kontakt të gjithë personave të cilët janë të përfshirë në këtë vatër duke filluar nga kontaktet e ngushta që janë familjarët dhe deri te kontaktet më të largëta që kanë të bëjnë me vendin e punës ose me persona që kanë pasur kontakt gjatë periudhës së inkubacionit të sëmundjes."- shpjegoi epidemiologia zingjirin që ndiqet për të identifikuar personat që mund të jenë të prekur.