SHBA-të janë ndër vendet më të prekura nga pandemia e koronavirusit. Aty jetojnë edhe shumë shqiptarë, një prej të cilëve është edhe Edmond Drishti, komandant prej 23 vitesh në departamentin e policisë në Hoboken (New Jersey). Gjatë kësaj kohe atij i duhet të jetë në detyrë me orare edhe më të zgjatura për shkak të situatës së vështirë. Edi, siҫ e njohin të gjithë aty, ka lindur në Amerikë dhe e flet gjuhën shqipe shumë mirë pasi babain e ka nga Shkodra dhe mamanë nga Tropoja. Po ashtu edhe bashkëshorten e ka nga Shkodra, gjë që ka ndikuar shumë që të ketë edhe një theks të dukshëm nga ky qytet. Ata kanë dy djem së bashku dhe vijnë ҫdo vit në Shqipëri. Edmondi është përditë në terren dhe në një lidhje skype na tregoi sesi është situata e epidemisë atje. "Disa nga të njohurit e të afërmve të mi kanë humbur jetën për shkak të virusit. Si oficer policie unë jam çdo ditë në terren në kontakt me njerëzit. Kemi maskat, syze dhe doreza por ne luftojmë me armik të padukshëm."- tha Edmond Drishti. Ndërkohë ai tregoi se e gjithë familja e tij është izoluar në shtëpi dhe frika më e madhe e tij është se se mos është ai që mund të çojë virusin "e pafytyrë" siç e emërtoi ai në shtëpi. " Ky virus është një armik "i pafytyrë". Është luftë e frikshme sepse larg qoftë mund të infektoj familjarët e mi, duke qenë në kontakt me njerëzit e tjerë. Familja ime është izoluar që prej ditës së parë. Djali mërzitet në shtëpi por i them; "Unë duhet të punoj që të të ruaj ty dhe të tjerët". Gruaja po ashtu po e ushtron profesionin si mësuese online dhe djemtë po ashtu mësojnë online".