Që prej fillimit të shfaqjes së rasteve të para në Shqipëri, një nga masat e marra nga autoritetet ishte mbyllja e shkollave. Të paktën deri tani është njoftuar që deri në 3 prill këto institucione do të vazhdojnë të qëndrojnë të mbyllura, ndërkohë që për nxënësit që ata të mos mbeten mbrapa me proçesin mësimor u zgjodh metoda e mësimdhënies online. Për të gjitha klasat tashmë e gjithë armata e mësuesve nëpërmjet rrjeteve sociale por edhe televiozionit publik shqiptar, por edhe nëpërmjet telefonit po mundohet ti vënë nxënësit në punë duke ju shpjeguar hap pas hapi të gjitha temat që ata do të bënin në klasë nëse do të ishin ditë normale. Por nëse për nxënësit e 9 vjeçares mund të jetë më e lehtë sepse edhe nëse do të kenë boshllëqe kjo nuk do t'i penalizojë sepse do të kenë mundësi që kur të kthehen ti rikuperojnë në klasë, për maturantët ndoshta do të jetë më e vështirë pasi ata janë përpara provimeve të maturës shumë të rëndësishme këto për të hyrë më pas në universitete. Deri tani për maturantët janë dhënë udhëzimet përkatëse, mësimi online ka nisur që prej datës 15 mars, ndërsa nuk është njoftuar nëse do të ketë shtyrje të datave të provimeve. Megjithatë si po e përjetojnë të rinjtë këtë situatë të pazakontë, kishim në një lidhje skype, dy maturante Nina Ahmetaj nga shkolla " Qemal Stafa", dhe Deni Allamani nga shkolla "Sami Frashëri".