Pasi ka shërbyer 24 orë me të sëmurët me Kovid momenti më i vështirë për një doktor është kthimi në shtëpi dhe frika se mos është mbartës i virusit dhe mund t'ua transmetojë të afërmve. E kësaj frike nuk i ka shpëtuar as doktor Qemajl Aliu. "Kjo është një nga pjesët më të sikletshme që të bën të jesh shumë i përgjegjshëm sepse ke frikën se mund të mbartësh virusin e t'ua transmetosh familjarëve. Normal ne i kemi procedurat e dezinfektimit edhe në hyrje edhe në dalje të spitalit. Unë me të tjera rroba shkoj në punë, me të tjera futem në pavijon me të tjera dal nga pavijoni dhe me të tjera shkoj në shtëpi. Kur futem në shtëpi dezinfektohem përpara se të hyj. Brenda 24 orëve të para mundohem të mos e takoj gruan dhe vajzën. Vajza e vogël turret gjithmonë për të më përqafuar dhe aq i madh është ai tundimi për të përqafuar vajzën sa shpesh është e pamundur t'i rezistosh por përgjithësisht i rezistoj me vështirësi tundimit për ta përqafuar."