Ashtu si po ndodh në të gjithë Evropën teksa shifrat janë në rritje dhe kanë nisur kufizimet edhe në Shqipëri, Komiteti Teknik i Ekspertëve ka vendosur që duke filluar që nga sot mësimi në universitete të zhvillohet online, në distancë, të paktën për një muaj dhe ndërkaq nuk do të hapen as konviktet të cilat shërbenin për strehimin e të rinjve. Një masë tjetër kufizuese që është diskutuar është dhe mbyllja e bareve, kafeve në zonën e ish Bllokut pas orës 22.00 të cilat konsiderohen si vatra të rrezikshme të përhapjes së infeksionit. Por a do të jenë këto vetëm masat e para shtrënguese , apo ato do të pasohen edhe nga të tjera? A po diskutohet një izolim i dytë si në fillimet e pandemisë? Si është situata në vatrat kryesore në vend , kryesisht në Tiranë e cila ka dhe popullsinë më të madhe? Mirela Cami Drejtoresha e Operatorit të Shërbimeve të Kujdesit Shëndetësor, njëkohësisht dhe anëtare e Komitetit Teknik të Ekspertëve tha se ky i fundit nuk e sheh si obsion izolimin total të vendit për shkak të pandemisë. "Komiteti Teknik i ekspertëve nuk po e sheh akoma vendimin për një karantinim gjeografik me zona apo të plotë në të gjithë vendin. Duket si një obsion më i largët për momentin. Aktualisht Komiteti Teknik po sheh si obsione të afërta shtrëngimin e masave më të lehta por që do të mundësonin ndalimin e përhapjes së infeksionit. Dhe kur them këto masa e kam fjalën për mbylljen e Universiteteve apo mësimi online, baret dhe restorantet, mund të shihet kufizimi i orareve, puna nga shtëpia për ato institucione që e kanë të mundur, pra do të shihen këto masa dhe më vonë mund të mendohet izolimi totale e vendit.