Anila Hyka Smorgrav është nënkryetare e Këshillit Koordinues i Diasporës prej kohësh ka ndërmarrë nismën që edhe shqiptarët që jetojnë jashtë vendit të kenë të drejtë vote. E ftuar sot në Wake Up ajo u shpreh se vota e diasporës është shumë e rëndësishme në situatën politike që ndodhet vendi ynë. "Të gjithë shqiptarët që ndodhën jashtë territorit shqiptar duhet të votojnë në vendin e tyre ashtu siç votojnë dhe në vendin ku jetojnë. Këtë të drejtë ne na e kanë premtuar. Sigurisht nuk kemi avancuar në këtë nismë aq sa do duhej por avantazhi i kësaj është se kërkesa jonë tashmë i ka kaluar Komisionit Zgjedhor dhe është ngritur edhe grupi i punës dhe që do ta ndjekë hap pas hapi. Ajo që mbetet më pas është çështja e regjistrimit dhe ndërgjegjësimit të diasporës. Por qëllimi kryesor i kësaj nisme, ku shpresojmë që të insistojnë dhe të gjithë faktorët politikë bashkë me median dhe shoqërinë civile, është që diaspora të ketë edhe përfaqësuesit e saj në Parlament."- tha Anila Hyka Smorgrav nënkryetare e Këshillit Koordinues i Diasporës.