Festivali i 11 i këngës shqiptare është rikthyer sërish përpara publikut pas 47 vitesh. Një organizim që për tri net rresht do të vijë në ambientet e muzeut të diktaturës Bunkart 1. Të gjithë ata që nuk e kanë shijuar në 1972, do të mund të rijetojnë krijimtarinë muzikore dhe atmosferën e atyre këngëve që 47 vite më parë tronditën regjimin komunist në Shqipëri. Ditën e djeshme është mbajtur nata e parë e festivalit, ndërkohë që prezantuesin e tij besnik , Bujar Kapexhiun e kemi ftuar në studio për të na rrëfyer emocionet por edhe disa nga detajet e këtij organizimi artistik, që ka bërë bashkë emra të njohur të muzikës shqiptare të cilët i kanë munguar skenës gjatë viteve të fundit. 20 këngët e festivalit të 11-të do të interpretohen në skenë, duke rijetuar edhe interpretime nga më origjinalet.