Brunilda Çullhaj pak kohë më parë është shpallur një nga finalistet e projektit "Datathon 2020" të Komunitetit Evropian me temë "Evropa jeshile për mjedisin", ku së bashku me grupin e saj kanë arritur të fitojnë vendin e dytë. Tre kolegët e saj janë të huaj dhe i gjithë ky projekt fillimisht nisi si një lojë mes tyre për të krijuar diçka që lidh digjitalen me mjedisin. Bëhet fjalë për një aplikacion që mat ndikimet që kanë patur fondet e investuara nga "Horizon2020" në mjedisin e zonave përkatëse. Më herët Brunilda ka punuar në EFSA (Europian Food Safety Authority). Ajo ka lindur në Shijak dhe është larguar për në Itali me familjen në moshën 14-vjeçare. Ka studiuar Ekonomik dhe ka qënë e angazhuar gjatë gjithë këtyre viteve si Analiste Biznesi, Specialiste Komunikimi dhe si Menaxhere Projektesh IT ku koordinon rreth 32 kolegë e bashkëpunëtorë të saj. Profesioni i specialistëve të IT është më shumë i lidhur me meshkujt dhe kjo e bën për t'u vlerësuar edhe me shumë punën e saj. Edhe pse i ka të gjitha mundësitë profesionale në Itali, ajo nuk e përjashton mundësinë për t'u kthyer në Shqipëri dhe për të krijuar këtu një kompani për konsulencë informatike.