Shqiptarët që pushojnë në Shqipëri duhet të marrin bonuse për pushimet. Ky ka qenë vetëm njëri nga propozimet operatorëve turistikë për qeverinë shqiptare, në pritje të nisjes së sezonit turistik. Ndërkohë që të gjithë presin hapjen e plazheve, por edhe kufijve, Shoqata Shqiptare e Turoperatoreve dhe Agjencive Turistike i ka kërkuar qeverisë mbështetje financiare jo vetëm për agjencitë, të cilat kanë qenë ndër më të prekurat nga pandemia, por edhe për qytetarët. Po ashtu agjencitë propozojnë që të shikohen masa stimuluese për turistët nga Kosova dhe rajonit me qëllim të nxitjes së bërjes së pushimeve në Shqipëri, si për shembull heqja e taksës së Rrugës se Kombit për sezonin turistik. Sipas tyre, nëse motoja e këtij viti do të jetë "shkoni me pushime në Shqipëri”, atëherë familjeve shqiptare duhet t’u jepen bonuse.