Dy ngjarje që implikuan dje rrezikun nga gazi, sollën edhe një herë në vëmendje kujdesin që duhet të kemi gjatë përdorimit të kësaj lënde djegëse. Një bombol gazi shpërtheu dje në mëngjes brenda një byrektore në rrugën “3 Dëshmorët” në Yzberisht, ku si pasojë është plagosur punëtorja, e cila ndodhet në spital jashtë rrezikut për jetën. Ndërsa po dje, në shkollën 9-vjeçare "Avni Rustemi" në Libohovë, gjithçka mund të ishte kthyer në tragjedi, kur sistemi ngrohës në shkollë, kaldaja me gaz, ka pësuar një defekt, dhe për pasojë gazi është përhapur në të gjithë shkollën. Fëmijët kanë dalë jashtë dhe pasi është rikthyer normaliteti, i janë rikthyer sërish mësimit. Inspektorati Shtetëror Teknik dhe Industrial pohon se 99% e rasteve të aksidenteve me gazin GLN vijnë pikërisht si rezultat i mosrespektimit të rregullave të sigurisë. Pothuajse në asnjë rast gjatë viteve të fundit nuk kemi pasur shpërthim ose plasje të një bombole fizike por rrjedhje, pra nga pakujdesia.