Alarmi i biznesit të vogël: Mos shumëfishoni gjobat, po falimentojmë. Nga Paketa Fiskale 2020 këto ditë vetëm sa janë bërë publike disa nga drejtimet kryesore, por bizneset e vogla dhe të mesme i bëjnë thirrje qeverisë që të mos shumëfishojë masën e gjobës për mos lëshim të kuponit tatimor, çka është edhe një nga penalitetet kryesore që diskutohet të përfshihet në këtë Paketë. Sipas tyre, kjo masë ose do të çojë bizneset e vogla drejt mbylljes, ose do të rritë korrupsionin. Sipas Shoqatës së Biznesit të Vogël e të Mesëm, zgjidhja e vetme është zgjerimi i bazës së tatueshme; pra të paguajnë të gjithë, të formalizohen të gjithë dhe të mos ketë më korrupsion në këtë sektor. Ndërsa në lidhje me zëvendësimin e kasës fiskale, kjo shoqatë ndërkohë kërkon që kosto e saj të mos i ngarkohet biznesit, i cili edhe ashtu është në vështirësi të mëdha financiare. Por nuk është vetëm kaq. Situata e bizneseve të vogla në Shqipëri paraqitet sipas Shoqatës tejet e rënduar. Problemet janë pa fund, që nga pasojat e TVSH-së mbi biznesin e vogël, rimbursimi i TVSH-së për disa sektorë, te çmimi i naftës, dhe deri te pagesa e energjisë elektrike.