Shërbimi në hoteleri-turizëm gjatë sezonit veror dhe kryesisht në Jug të vendit diskutohet çdo vit me idenë se diçka do të përmirësohet. Por sivjet është ndryshe. Shumë biznese turistike po ankohen se nuk po gjejnë dot as kamerierë dhe punëtorë të tjerë sezonalë. Turizmi këta tre muaj ka krah pune sezonal, por nuk është vetëm kjo, pasi ata që kanë investuar miliona në resorte e hotele shumë yje, “harrojnë” atë që është më e rëndësishmja: Shërbimin! I cili sivjet ndoshta harrohet edhe më shumë për shkak të masave të shtuara anti-Covid. Gladiola Dona, eksperte e hotelerisë dhe turizmit, mendon se shërbimet hoteliere sivjet duhet të bazohen në një strategji që bazohet në tre shtylla kryesore: Sigurinë e klientëve; Vlerën e shtuar me staf të trajnuar për të justifikuar ndoshta rritjen e kostos dhe; Performancën në përgjithësi.