Delegacioni i Bashkimit Evropian në Shqipëri ka disa kohë që ka filluar fushatën “Evropa është këtu”. Objektivi i kësaj fushate është krijimi i vetëdijes dhe informimi se Bashkimi Evropian është donatori më i madh në Shqipëri dhe se mbështet të gjithë shqiptarët për t'u bërë qytetarë të ardhshëm të BE. Komunikimi i kësaj fushate është fokusuar në tre sektorë specifikë: infrastruktura, mjedisi dhe bujqësia. "Që nga vitit 1990 e deri më sot projektet kombëtare, pra ato projekte që kanë qenë mes BE dhe Shqipërisë kapin shifrën e 2.5 milardë euro në grante, pra donacion. Mesatarisht në çdo vit Bashkimi Evropian i jep Shqipërisë 100 milionë euro grante. Dhe këto janë donacione vetëm në aspektin dypalësh pra BE-Shqipëri. Nuk po përfshijmë këtu pjesëmarrjen e Shqipërisë në projekte rajonale ndërkufitare. "- tha për Wake Up, Mario Mariani, Shef i Bashkëpunimit të Delegacionit Evropian në Shqipëri i cili shpjegoi gjithashtu me detaje se cilat janë projektet më të rëndësishme që janë mbështetur ndër vite nga Bashkimi Evropian dhe cili është qëllim i kësaj mbështetjeje dhe vëmendje që BE ka për Shqipërinë.