Ervis Nallbani është një balerin i njohur shqiptar, i cili e ka vijuar karrierën e tij edhe në Amerikë ku jeton prej dy vitesh e gjysmë. Ne e njohim si balerin i parë i trupës së teatrit të Operas së Baletit, pasi për rreth 20 vite ai ka interpretuar në shumë role dhe shfaqje të rëndësishme, përfshirë këtu edhe spektakle apo programe televizive. Në vitin 2002 ai është angazhuar në Stockholm me një kompani baleti atje. Po ashtu është ka patur një eksperiencë edhe në Itali në kompaninë "Baletto del Sud". Në vitin 2017 ka fituar edhe çmimin Kulti si balerini më i mirë. Ndërkohë është vendosur jashtë Shqipërisë fillimisht në New York dhe tashmë në Connecticut, ku ka një sërë angazhimesh që lidhen me baletin. Ai punon me kurse me të gjitha grupmoshat dhe po ashtu me personat me aftësi ndryshe. Kjo e fundit është një nga eksperiencat më emocionuese që ka provuar. Ai ka marrë pjesë në disa konkurse dhe po ashtu është i angazhuar edhe me mësimin e baletit online.