Çmimi Inovacioni i Vitit është padyshim një prej kategorive më të spikatura në ICT Awards që mbylli para pak ditësh edicionin e tetë të tij. Fituesit e këtij çmimi kanë provuar të jenë histori të vërteta suksesi, zgjidhje inovative shqiptare të cilat kanë tërhequr vëmendjen e shumë investitorëve dhe kompanive të huaja. Digital Human Avatars and AI from Smartphones for AR Body Applications zhvilluar nga kompania Arbrea Labs ishte projekti i cili mbërriti në finale dhe triumfoi në këtë kategori. Në krye të kësaj kompanie me bazë në Zvicër, është pikërisht Endri Dibra një shqiptar nga Durrësi, që prej vitesh e ka ngritur të ardhmen e tij jashtë vendit. Aplikacion mobil i Endrit është për pacientë dhe kirurgë, i ndërtuar i gjithi në inteligjencë artificiale dhe realitetin e shtuar. Funksioni kryesori i produktit është të vizualizojë trajtimet kirurgjikale direkt në trupin e pacientit.