Komisionerët e Avokatit të Popullit kanë ndjekur dje në terren me shqetësim ngjarjet te zona e Astirit në segmentin e Unazës së Re ku janë shënuar përplasje midis banorëve që kundërshtojnë një projekt – sipas tyre - ende të kontestuar infrastrukturor dhe forcave të rendit. Avokati i Popullit, i cili prej një muaji ka dërguar në Kuvendin e Shqipërisë një raport të veçantë mbi çështjen e Astirit dhe ende është në pritje të përgjigjes, u ka bërë bërë thirrje institucioneve dhe qytetarëve për vetëpërmbajtje, maturi, si dhe për garantimin e plotë të të Drejtave të Njeriut. Avokati i Popullit u shpreh dje se autoritetet shtetërore duhet të mënjanojnë konfliktin me qytetarët, të mos zbatojnë politikën e faktit të kryer e të mos e tejkalojnë me anë të zellit të pajustifikuar detyrën e tyre, sidomos në kushtet kur çështja për të cilën ka lindur ky konflikt nuk është sqaruar.