Askush më tashmë nuk e fsheh ankthin për COVID-in: dikush e ka kaluar, dikush tjetër po e provon. Ndërkohë që të gjithë po jetojmë tani në pritje të vaksinës. A thua se po nisi të shpërndahet nesër në Evropë, pasnesër do të mbërrijë edhe në Shqipëri. Gjithsesi akademiku Artan Fuga ka dhënë një lajm të mirë dje duke informuar se në Gjermani ka nisur informimi i popullsisë se do të nisë vaksinimi kundër COVID-19. Profesor Fuga shkruan se do të vaksinohen rreth 80 mijë persona në ditë dhe ky është një lajm i mirë edhe për Shqipërinë. Ai është një prej shqiptarëve që e mposhti COVID-19, ndërkohë që edhe pse tashmë ka fituar imunitet thekson se vaksinën do ta bëjë gjithsesi, madje do të dalë vullnetar për ta bërë atë. Në një lidhje skype me Wake Up në Top Channel, akademiku i njohur shpjegoi arsyen se pse ai është pro vaksinës AntiCovid.