Me siguri këto ditë keni lexuar spekulime nga më të ndryshmet për përfundimin apo në jo në kohë të stadiumit; por më e rëndësishmja ka të bëjë nëse do të luhet apo jo ndeshja kualifikuese me Francën, për të cilën shitja e biletave është drejt fundit. Dhe, për të shuar dilemat ne kemi sot në studio Arben Dervishajn, shefin e infrastrukturës në Federatën Shqiptare të Futbollit, personin që ka ndjekur nga themelet ndërtimin e impantit të ri. Stadiumi i ri i Kombëtares shqiptare të futbollit ka një kapacitet 22.000 vende me të gjitha tribunat e mbuluara. Impianti i ri modern është investimi më i madh i kryer në futbollin shqiptar dhe tashmë futbolli shqiptar ka një shtëpi të re me të cilën do të përfaqësohet denjësisht në kompeticionet e rëndësishme sportive. Stadiumi i ri është projektuar si një teatër romak ose grek, me tri pjesë për publikun dhe një skenë që është tribuna VIP. Elementi historik është ai që mbizotëron. Gjithë stadiumi ka elementin e kolonave që simbolizon stilin e viteve ’30, element ky i lidhur ngushtë me periudhën historike. Janë mbi 3 mijë kolona që rrethojnë Arenën Kombëtare mbi të cilat janë gdhendur motive të veshjeve shqiptare.