Nëse një lajm të preferuar apo informacion të rëndësishëm nuk e lexoni dot për arsye nga më të ndryshmet tashmë atë mund ta dëgjoni fare lehtë nëpërmjet versionit audio. Javët e fundit një grup të rinjsh kanë prezantuar projektin e tyre që njihet me emrin aplikacioni Zëri, i cili është i vetmi në gjuhën shqipe që kthen tekstet në audio, pra ju mundëson të dëgjoni në vend që të lexoni. Një nga ideatorët e këtij aplikacioni është Festim Peposhi, i diplomuar në Fakultetin e Shkencave në Tiranë i cili aktualisht punon në Gjermani në një kompani teknologjie. Aplikacioni Zëri është një projekt i cili ka nisur rreth 2 vite më parë, por ka vetëm 3 javë që është prezantuar, duke i ardhur në ndihmë studentëve, të moshuarve dhe personave me aftësi ndryshe. Për më gjatë folëm për këtë aplikacion me ideatorin, inxhineri IT, Festim Peposhin.