Kosova nuk i ka shpëtuar Covid-19, edhe atje vazhdojnë të shënohen raste. Autoritetet kanë shpallur gjendjen e emergjencës së shëndetit publik, pas rritjes së numrit të personave të prekur me COVID-19. Kufijtë janë mbyllur për të huajt dhe fluturimet ndalohen në aeroportin e Prishtinës. Tri komuna të Kosovës tashmë janë në karantinë, Klina, Vitia, Malisheva. Ndërkaq në pjesën tjetër të vendit janë bërë thirrje për distancim nga vendet publike, nga grumbullimet masive. Por si po përjetohet kjo situatë nga banorët e Prishtinës, aty ku është dhe përqendrimi më i madh i popullsisë? Ne sot ishim në një lidhje nga Prishtina me Uta Ibrahimin, alpinisten e njohur tashmë për publikun. "Është shumë e çuditshme se ka panik dhe njerëzit. Fatmirësisht po apelohet për kujdes. Radhët në markete nuk janë aq të gjata sa në fillim kur kishte shumë panik. Për momentin s'ke miell ku të blesh nëse do të blesh miell. Mendoj se këto veprime të njerëzve këtu, vijnë edhe si pasojë e përjetimeve gjatë luftës në Kosovë ku unë vetë kam qëndruar e mbyllur 3 muaj në shtëpi për shkak të bombardimeve dhe erdhi një moment që nuk kishim bukë me hëngër. Dhe mendoj se kjo mungesë dhe ky panik që kanë këtu në Kosovë është edhe si rezultat i përjetimeve të kaluara sepse njerëzit mendojnë se mund të vijë një kohë që realisht do të ngelemi dhe pa ushqime dhe pa bukë"