Ministri i Turizmit, Blendi Klosi u bë lajm i javës në media dhe rrjete sociale pas deklaratës së tij se virusi i COVID-19 përhapet edhe përmes valëve duke iu referuar valëve të muzikës. Argumenti i Ministrit Klosi i padëgjuar më parë u komentua gjatë këtë javë madje dhe u kthye në Hit-in e memeve. I pyetur për këtë deklaratë që sipas Klosit është e vërtetuar edhe shkencërisht eksperti i Shëndetit Publik, Doktor, Erion Dasho e konsideroi jo vetëm qesharak si argument por sipas tij, deklarata të tilla nga njerëz jo profesionistë të fushës është në dëm të shëndetit të publikut. "Këto hyjnë në anën qesharake të sëmundjes. Dhe ana qesharake vjen kur persona që nuk janë kompetentë fillojnë e flasin për sëmundjen. COVID-19 është sëmundje dhe me këtë duhet të merren mjekët dhe specialistët e fushës. Kur ë në këtë diskutim përfshihen ministra turizmi, ekonomie, kryeministra apo dhe presidentë siç kemi parë në Amerikë dhe vende të tjera, situata komplikohet edhe më tepër. Këta e shfrytëzojnë për qëllime politike dhe në mendimin tim kur epidemitë arrijnë të shfrytëzohen për qëllime politike kjo hyn në sferën kriminale dhe këta persona janë duke i bërë një dëm shumë të madh qytetarëve dhe duhet urgjentisht të heqin dorë nga aventurat në një fushë që as e njohin dhe as nuk duhet të përfshihen"- tha Dasho.