Koronavirusi nuk ka kursyer as Maqedoninë e Veriut. Por nëse në vendet e tjera në rajon duket se shifrat po rriten duket se aty gjendja është më e stabilizuar, ndërkohë që pak ditë më parë u raportua dhe lajmi nga Ministria e Shëndetësisë se pacientja e parë në Maqedoni me koronavirus ka lënë spitalin, për trajtim shtëpiak. Ajo është testuar për herë të dytë, në përputhje me rekomandimet e OBSH-së dhe ka rezultuar negativ. Ndërkaq autoritet kanë ndërmarrë po të njëjtat masa si është ndjekur dhe në vendet e tjera, duke mbyllur shkollat, restorantet, baret, pubet dhe duke ndaluar grumbullimin e njerëzve në ambientet publike. Në një lidhje Skype nga Tetova e Maqedonisë Egzon Ademi, kimist asistent profesor në Universitetin e Tetovës tha se 25 rastet që kanë rezultuar pozitiv me virusin Covid-19 janë në Dibër të Madhe dhe qeveria ka vënë në karantinë gjithë zonën e Dibrës së Madhe. I pyetur nëse ka shqiptarë mes tyre ai tha se nuk ka ende një statistikë sipas etnive por fakt është që rastet pozitive janë izoluar dhe i përkasin Dibrës së Madhe.