Ekzekutori i Ardian Nikulaj në Shëngjin, Ruben Saraiva është ende në kërkim së bashku me një shtetas anglez, Harry Simpson. Kur në Shqipëri doli identiteti i Saraivës si vrasësi i Nikulajt, në rrjetet sociale pati edhe postime sin ë TikTok. Një person me emrin e llogarisë, Ruben Saraiva, identiteti i vërtetë i të cilit nuk mund të verifikohet, shkroi në portugalisht se mediat shqiptare kishin shpifur. Deri më tani janë katër të arrestuar në Londër, si të akuzuar për përfshirje në vrasjen e biznesmenit: Edmond Haxhia, Stephen Hunt, Thomas Mithan dhe Harriet Bridgeman. Teksa hetimet vijojnë, në Shqipëri kanë mbërritur një prokuror dhe oficer anglez. Ata janë vendosur në prokurorinë e Lezhës, ku po kryen hetimet në lidhje me vrasjen e biznesmenit Ardian Nikulaj. Mësohet se detyra e tyre është që të njihen me aktet proceduriale dhe provat me qëllim ekstradimin sa më shpejt të katër të arrestuarve. Sipas hetimeve, Edmond Haxhia, ishte ai që organizoi shtetasit e huaj për të kryer vrasjen e biznesmenit. Ai është nipi i Elton dhe Klodian Lestakajt, të cilët ishin në gjak me Nikulajn. (Ardi Pulaj)