Varrezat publike në Lushnje dhe Fier janë kthyer në “pronë private”. Pas denoncimit të rasteve të përsëritura në varrezat e Durrësit, kamera e Fiksit faktoi të njëjtin fenomen edhe në Myzeqe; betonizime dhe vende të zëna. Fenomeni ndodh rëndom edhe në varrezat e reja të qytetit të Lushnjes, në fshatin Allprenaj. Një vit më parë, banorët e këtij fshati kundërshtuan ndërtimin e këtyre varrezave. Ata u shprehën se toka është argjile dhe se ujërat e shiut nuk lejojnë të ndërtohen varre. Por, pikërisht në atë tokë, vijon edhe sot të ndërtohen dhe madje të zihen e prenotohen vende. Në këto varreza shihet parcela e re ku janë bërë varrime në vitet 2023 dhe 2024 në Lushnje. Ndërkohë, sapo kalon murin rrethues, fillojnë “prenotimet” e varreve. Varret si gjithmone kanë një kornizë të hollë betoni dhe janë pa emër e pa foto. Keto vende të prenotuara janë gjithmonë ngjitur me një varr tjetër që është i identifikueshëm. Fiks Fare bëri të njëjtin vëzhgim edhe në varrezat e qytetit të Fierit, ku hasi në të njëjtin fenomen. Në këto varreza prenotimi ka vijuar prej vitesh, pasi vende të tilla ndodhen në të gjithë hapësirën e varrezave. E njejta pamje për secilin vend , një mermer i hollë ose beton i hollë, dikush me e dikush pa vazo luleje, por të gjithë pa emër e pa foto.