Një vit pas, rrugët e ngushta të Banjskës, duken të heshtura, një heshtje që mbart atë ngarkesë të rëndë që la pas ngjarja e 24 shtatorit 2023 kur një grup terrorist serb i drejtuar nga Milan Radoiçiq, sulmoi policinë e Kosovës. Nga sulmi mbeti i vrarë rreshteri i policisë, Afrim Bunjaku dhe u plagosën katër të tjerë. Do të mbetet gjatë në kujtesën e banorëve ajo natë e errët. Ishte ora 1:00 e mëngjesit kur grupi terrorist i strukturuar hyri në Kosovë përmes rrugëve malore, nga kufiri me Serbinë. Ata kishin me vete makina të blinduara, armë të rënda, municione dhe pajisje logjistike ushtarake. Ata filluan të bllokonin rrugët në hyrje të fshatit, duke përdorur kamionë të mëdhenj për të ndaluar hyrjen e autoriteteve. Kreu i grupit të policëve të Kosovës, Polici Afrim Bunjaku përball me guxim me grupin terrorist ku dhe mbeti i vrarë në vend.