Prej mesditës së të dielës një re e madhe tymi ka përshkruar kryeqytetin e Greqisë, pas zjarreve të përmasave të mëdha në periferi të Athinës. Zjarret kanë dalë jashtë kontrollit në verilindjen e Atikës, periferisë së kryeqytetit grek duke djegur dhjetëra shtëpi, makina dhe hektarë të tëra tokë pyjore e bujqësore, ndërsa shtrirja e saj ka arritur një distancë deri në 30 km. Qindra zjarrfikës u përpoqën të mos lejojnë flakët të kalojnë tek zonat e banuara deri në mëngjes kur filluan të operojnë mjetet nga ajri. Dhjetëra banorë nga 11 qyteza dhe fshatra janë lajmëruar dhe urdhëruar të largohen nga shtëpitë e tyre pasi flakët në shumë vende arrijnë në 25 metra, ndërsa era fryn me fuqi 8 ballë. Flakët tashmë janë 500 metra nga Grammatiko, fshat që ishte evakuuar më herët, ndërsa janë urdhëruar të evakuohen banorët në Drafi, Dhioni, Dasamari si dhe ata të Pentelit dhe Nea Pentelit, bashkë me 400 fëmijët e një kampi si dhe pacientët e Spitali Ushtarak 414. Autoritetet kanë njoftuar se situata ka dalë jashtë kontrollit, ndërsa mbrëmjen e të dielës ishte e pamundur ndërhyrja nga ajri. Sakaq në terren po operojnë 560 zjarrfikës me 177 automjete, 16 grupe vullnetarësh si dhe 32 mjete ajrore, 17 avionë dhe 15 helikopterë. Në zonën e Varnavës, ku nisi dhe zjarri janë djegur të paktën 20 shtëpi dhe flakët kanë mbërritur në një distancë të afërt në zonën e Nea Makrit. Vetë kryeministri grek Mitsotakis ka ndërprerë pushimet dhe është kthyer nga Kreta në Athinë, për shkak të situatës kritike. Autoritetet po bëjnë përpjekje për të shpëtuar edhe kafshët duke i strehuar përkohësisht në një qendër koordinimi. Sipas shërbimit sinoptik kombëtar distanca në të cilën ka shkuar reja e tymit nga zjarret, llogaritet të jetë më shumë se 300 km. Greqia ka regjistruar dimrin më të ngrohtë të regjistruar në dhjetëvjeçarët e fundit.