Qendra Klinike Universitare e Kosovës konfirmoi të enjten se një pacient ka humbur jetën për shkak të një zjarri në njërën nga dhomat në Repartin e Urgjencës Psikiatrike të këtij institucioni një natë më parë. Sipas njoftimit të QKUK-së, zjarri, që la një person të vdekur dhe pesë të lënduar, nisi rreth orës 23:00 në një dhomë të mbyllur, ku qëndrojnë përkohësisht pacientët që bëhen agresiv dhe humbin vetëdijen. “Dyshohet se një pacient i ka vënë zjarrin në rrethana të panjohura dhomës së mbyllur, dhe si pasojë e asfiksimit nga tymi ai ka humbur jetën, përkundër përpjekjeve maksimale të stafit shëndetësor për ta shpëtuar pacientin”, thuhet në njoftimin e QKUK-së. Më tutje, në këtë njoftim bëhet e ditur se shenja të helmimit nga tymi kanë shfaqur edhe pesë persona në këtë klinikë – një paciente, dy mjekë dhe dy infermierë. Këta të fundit, siç thuhet në komunikatën e QKUK-së, u lënduan “gjatë ofrimit të ndihmës për pacientin në fjalë dhe evakuimit të pacientëve të tjerë”. QKUK-ja bën të ditur se tashmë rasti është duke u hetuar nga njësitë përkatëse të Policisë së Kosovës.