Për të pestën ditë radhazi, transportuesit e mallrave nga Serbia dhe Bosnje-Hercegovina po i vazhdojnë bllokadat në pikat kufitare me Bashkimin Evropian. Terminalet për mallra janë bllokuar në 22 pika dalëse dhe 19 pika hyrëse vetëm në Serbi. Drejtuesit e kamionëve protestojnë kundër procedurave të ashpra për të hyrë në Zonën Schengen, të cilat, sipas tyre, ua kanë shkurtuar kohën e qëndrimit në shtetet e Bashkimit Evropian. Ata kërkojnë që periudha e qëndrimit të zgjatet nga tre në katër muaj brenda një periudhe gjashtëmujore. Paralajmërimet fillestare ishin që bllokadat të zgjasnin për të paktën një javë, në rast se nuk arrihet ndonjë marrëveshje. Sipas presidentit të Dhomës së Tregtisë në Serbi, në ditën e parë të bllokadave dëmi direkt ditor që iu shkaktua ekonomive të Ballkanit Perëndimor shkon në rreth 100 milionë euro. Drejtuesit e kamionëve nga Mali i Zi dhe Maqedonia e Veriut kanë hequr dorë prej masave më 29 janar, pasi Komisioni Evropian bëri të ditur se po punon në një strategji të re për viza që parashikon zgjidhjen e çështjes. Kosova nuk ka marrë pjesë në protestë, mirëpo pasojat janë ndjerë, për shkak se pjesën më të madhe të importit dhe eksportit e realizon përmes transiteve nëpër këto vende.