Zgjerohet kategoria e personave që do të përfitojnë nga amnistria. Krahas 380 personave, mes tyre gra dhe të mitur, do të jenë mbi 7 mijë persona që do t’i shuhen dosjet penale. Bëhet fjalë për personat që janë proceduar, janë ende nën hetim ose gjykim për veprat penale të “vjedhjes” dhe “drejtimit të parregullt të automjeteve”. Ministri i drejtësisë Besfort Lamallari theksoi se nuk bëhet fjalë për personat që janë dënuar dhe proceduar nga GJKKO dhe SPAK. Sipas Lamallarit, amnistria i vjen në ndihmë edhe shqetësimit të ngritur në disa raporte të KE për numrin e lartë të paraburgosurve në Shqipëri. Ministri shtoi se po punohet për draftin e Kodit të Ri Penal, ndërsa për ndryshimet e fundit që u miratuan në Parlament kishin të bënin me përafrimin e direktivave të dhëna nga Bashkimi Evropian.